- കൊല്ലം: ശാസ്താംകോട്ടയിലെ യുവതിയെ മരിച്ച നിലയില്‍ കണ്ടെത്തിയ സംഭവത്തില്‍ പുതിയ വഴിത്തിരിവ്. യുവതിയെ ഭര്‍ത്താവാണ് കൊലപ്പെടുത്തിയതെന്ന് പൊലീസ് കണ്ടെത്തി. മൈനാഗപള്ളി സ്വദേശിനി ശ്യാമയെ കഴുത്ത് ഞെരിച്ച് കൊലപ്പെടുത്തിയതായി ഭര്‍ത്താവ് രാജീവ് പൊലീസിനോട് സമ്മതിച്ചു.
കൊലപാതകത്തിന് പിന്നിലെ കാരണം വ്യക്തമല്ലെന്ന് പൊലീസ് അറിയിച്ചു. കഴിഞ്ഞ ദിവസം വീട്ടിനുള്ളില്‍ മരിച്ച നിലയില്‍ കണ്ടെത്തിയ ശ്യാമയെ ആശുപത്രിയിലെത്തിച്ചുവെന്നായിരുന്നു രാജീവിന്റെ മൊഴി. എന്നാല്‍, ശ്യാമയുടെ മരണത്തിന് പിന്നാലെ രാജീവ് പൊലീസ് നിരീക്ഷണത്തിലായിരുന്നു.
പോസ്റ്റ്മോര്‍ട്ടത്തില്‍ യുവതിയുടെ മരണം കൊലപാതകമാണെന്ന് തെളിഞ്ഞതോടെ രാജീവിനെ പൊലീസ് ചോദ്യംചെയ്തു. തുടര്‍ന്ന് രാജീവ് തന്നെ ശ്യാമയെ കൊലപ്പെടുത്തിയതാണെന്ന് വെളിപ്പെടുത്തി. സംഭവവുമായി ബന്ധപ്പെട്ട് കൂടുതല്‍ അന്വേഷണം തുടരുകയാണ്.
