വെഞ്ഞാറമൂട് കൂട്ടക്കൊലപാതകത്തിൽ പ്രതിയായ അഫാന്റെ മൊഴി പുറത്തുവന്നു. പാങ്ങോട് പൊലീസിനോടുള്ള മൊഴിയിൽ, സഹോദരൻ അഫ്സാനെയും പെൺസുഹൃത്ത് ഫർസാനയെയും കൊലപ്പെടുത്താൻ ധൈര്യം നേടാൻ വേണ്ടിയാണ് മദ്യപിച്ചതെന്ന് അഫാൻ തുറന്നുപറഞ്ഞു.
ഫർസാനയെ കൊലപ്പെടുത്തുന്നതിന് മുമ്പ്, അഫാൻ മറ്റു കൊലപാതകങ്ങളെക്കുറിച്ച് അവളോട് സംസാരിച്ചു. “ഇതെല്ലാം ചെയ്തിട്ട് നമ്മൾ എങ്ങനെ ജീവിക്കും” എന്നായിരുന്നു ഫർസാനയുടെ അവസാന ചോദ്യം. അതിനുശേഷം, കസേരയിൽ ഇരുന്ന ഫർസാനയെ പ്രതി ചുറ്റിക ഉപയോഗിച്ച് അടിച്ചു വീഴ്ത്തിയതായും മൊഴിയിൽ പറയുന്നു.
മുത്തശ്ശി സൽമാബീവി നിരന്തരം അമ്മ ഷെമിയെ കുടുംബത്തിനുണ്ടായ കടബാധ്യതയ്ക്ക് ഉത്തരവാദിയാക്കി കുറ്റപ്പെടുത്തുകയായിരുന്നു. ഇതാണ് മുത്തശ്ശിയോടുള്ള വൈരാഗ്യത്തിന് കാരണമായത്.
അഫാന്റെ മൊഴിപ്രകാരം, പിതൃസഹോദരൻ ലത്തീഫിന്റെ ഭാര്യയെ കൊലപ്പെടുത്താനുള്ള ഉദ്ദേശം ഉണ്ടായിരുന്നില്ല. എന്നാൽ, ലത്തീഫിന്റെ കൊലപാതക വിവരം പുറത്തറയുമെന്ന ഭയത്താൽ ലത്തീഫിന്റെ ഭാര്യയെ കൊലപ്പെടുത്തിയതായാണ് മൊഴിയിൽ വ്യക്തമാക്കുന്നത്.
അതേസമയം, അഫാന്റെ പിതാവ് അബ്ദുൽ റഹീം ഇന്ന് രാവിലെയാണ് ദമാമിൽ നിന്ന് തിരുവനന്തപുരത്തെത്തിയത്. തുടർന്ന്, ബന്ധുക്കളോടൊപ്പം ആശുപത്രിയിലെത്തി ചികിത്സയിൽ കഴിയുന്ന ഭാര്യ ഷെമിയെ സന്ദർശിച്ചു. യാത്രാ രേഖകൾ ശരിയായതിനു ശേഷമാണ് അദ്ദേഹം നാട്ടിലെത്തിയത്.
റഹീമിനോട് ഷെമി, “കട്ടിലിൽ നിന്ന് വീണതാണ്” എന്ന് പറഞ്ഞതായി അദ്ദേഹത്തിന്റെ ബന്ധു മാധ്യമങ്ങളോട് വെളിപ്പെടുത്തി. ഷെമി ഇപ്പോൾ ഗോകുലം മെഡിക്കൽ കോളേജിൽ ചികിത്സയിലാണ്.
